საქართველოს მხატვარ-კალიგრაფთა კავშირი

კალიგრაფიის ხელოვნება დაიხვეწა და განვითარდა წიგნის ხელოვნებასთან ერთად. ხელნაწერი წიგნის შექმნა არის ურთულესი პროცესი და აქედან გამომდინარე - კალიგრაფის შემოქმედების მწვერვალი.

ტრადიციულად, ხელნაწერთა ორიგინალები მხოლოდ შეძლებულ დამკვეთთა ხელში ხვდება. იმისათვის რომ ხელნაწერი წიგნის მადლი სხვა დამფასებლებმაც შეიგრძნონ, საქართველოს მხატვარ-კალიგრაფთა კავშირი ეძებს მხატვრულ-ტექნიკურ გადაწყვეტებს.

კალიგრაფთა კავშირმა მოახდინა თანამედროვე ხელნაწერი წიგნის გამომსახველობისა და რაობის კლასიფიცირება, რაც ხელნაწერ ნაშრომს ხელმისაწვდომს ხდის საზოგადოების სხვადასხვა სოციალური ფენისთვის.

პირველი კატეგორია - ესაა ხელნაწერის დედანი, აკინძული წიგნად, ან წარმოდგენილი ცალკეულ გვერდებად ერთგვაროვან ჩარჩოებში, თუკი წიგნის გვერდების რაოდენობა და დეკორატიულობა ამის საშუალებას იძლევა. მაგალითად, სქელტანიანი წიგნების დედნები მხოლოდ იკინძება, მაშინ როცა წიგნის შემადგენელი 8-დან 50-მდე მხატვრულ-დეკორატიული გვერდის დედანი შეიძლება ჩარჩოთი უფრო ეფექტურად განთავსდეს დამკვეთის საცხოვრებლის, თუ ოფისის კედელზე.

მეორე კატეგორია - ეს ხელნაწერთა რეპროდუქციებია, ექსკლუზიურად შედგენილი და აკინძული ხელნაკეთ წიგნად, გამორჩეული ყდით, ან წარმოდგენილი ცალკეულ გვერდებად ერთგვაროვან ჩარჩოებში.

მესამე კატეგორია - აქ შედის ხელნაკეთი, არასტამბური ასლები, არაექსკლუზიურად შედგენილი, თუმცა ყოველი წიგნი მაინც გამოირჩევა ინდივიდუალობით.

კალიგრაფთა კავშირი ხელნაწერ წიგნებს, ან სხვა სახის ხელნაწერებს არ აკავშირებს იდენტურ, სტამბურ გამოცემებთან.

მოცემული სამი კატეგორია სავსებით საკმარისია იმისათვის, რომ თანამედროვე ხელნაწერები ყველასათვის ხელმისაწვდომი გახდეს და ამავე დროს, მხატვრულ-ტექნიკური ღირებულების მხრივ ფასეულ ნაშრომად წარმოჩინდეს.

პირველი კატეგორია - დედნები

ვაჟა-ფშაველას პოემა - "სტუმარ-მასპინძელი" (2009) - ხელნაწერთა ორიგინალები მოთავსებულია ჩარჩოში, კედელზე გამოსაფენად. წიგნი შედგება 32 გვერდისგან, ფორმატი - A4 ( 21/29,7სმ). ხელნაწერი შესრულებულია ავტოკალმითა და შავი მელნით, გამოყენებულია წითელი მელანიც. 7 მინიატურა, საზედაო ასოები და ორნამენტული დეკორი შესრულებულია ფუნჯითა და წყლის ტემპერით. ქაღალდი დამუშავებულია პარაფინით.

ლოცვანი (1991 წლის დეკემბერი - 1992 წლის იანვრის 17) - თავმოყრილია: საქართველოს მართლმადიდებელი ეკლესიის მიერ დადგენილი დილის, ძილად მისვლის და საყოველდღეო ლოცვანი. ხელნაწერ წიგნში 64 გვერდია, ზომა 10/14სმ. ორნამენტები და საზედაო ასოები შესრულებულია ტემპერით. შემოსილია ტყავის ყდით.

იოანე შავთელის "აბდულმესიანი" (1991) - თამარ მეფისა და დავით სოსლანის შესხმა (ქება), სავარაუდოდ დაწერილია ბასიანის ბრძოლაში ქართველთა ბრწყინვალე გამარჯვების აღსანიშნავად. ხელნაწერ წიგნში 108 გვერდია, ზომა 16.5/17სმ. გამოყოფილია საზედაო ასოები და ანბანური ნომერაცია, ასევე ცალკეული სტროფები. ქაღალდი დამუშავებულია პარაფინით. შემოსილია ტყავის ყდით და მოოქროვილი ორნამენტული დეკორით.

მეორე კატეგორია - ექსკლუზიური რეპროდუქციები

წმიდა დავით გარეჯელის ცხოვრება (1993) - ხელნაწერის დედანი დაზიანებულია, მაგრამ მოხერხდა მისი აღდგენა ციფრული სახით. წიგნში 22 გვერდია, ზომა 15/21სმ. ქაღალდი დამუშავებულია პარაფინით. შემოსილია ტყავის ყდით. გარეკანზე დამატებულია ხელნაწერი ხატი (მუყაო, ტემპერა).

მესამე კატეგორია - არაექსკლუზიური ხელნაკეთი ასლი

წმიდა ანტონ მარტყოფელის ცხოვრება (2010) - წიგნში 24 გვერდია, ზომა 15/21სმ. ორნამენტული დეკორი, საზედაო ასოები და 5 მინიატურა. წიგნის გვერდების არასტამბური ამონაბეჭდები აკინძულია ხელით, ყდისთვის გამოყენებულია მუყაო, ტყავი და დეკორატიული ქაღალდი.