საქართველოს მხატვარ-კალიგრაფთა კავშირი

გამოფენა პატრიარქის იუბილეზე

2013 წლის 3 იანვარს საქართველოს მხატვარ-კალიგრაფთა კავშირი უერთდება სრულიად საქართველოს კათალიკოს-პატრიარქის საიუბილეო ღონისძიებას და ექსპოზიციას მართავს წმ. სამების საკათედრო ტაძრის ახალგაზრდული ცენტრის საგამოფენო დარბაზში.

წარმოდგენილია 2011 წლის საერთაშორისო პროექტის ფარგლებში ქართველი და უცხოელი კალიგრაფების მიერ კალიგრაფიულად შესრულებული ვაჟა-ფშაველას პოემები, ლექსები და ფრაზები.

პატრიარქთან შეხვედრაზე მისული სტუმრები ღონისძიების ბოლოს ყურადღებით ეცნობიან თანამედროვე ხელნაწერებს და ხედავენ ქართული დამწერლობის ტრადიციების აღორძინების შედეგს.

ფოტოგალერეა - 3 იანვარი 2013, წმ. სამების საკათედრო ტაძარი

ვაჟა-ფშაველას 150 წლის იუბილეზე შექმნილი ნამუშვრები 2013 წლის 26 ოქტომბერს კიდევ ერთხელ გამოიფინა მწერლის მუზეუმში.

"ვაჟაობის" სახალხო დღესასწაული 2013 წელს შემოდგომაზე გაიმართა. საქართველოს მხატვარ-კალიგრაფთა კავშირი კვლავაც ჩაერთო ზეიმში და ვაჟა-ფშაველას მუზეუმში ქართველი და უცხოელი კალიგრაფების ხელნაწერები გაშალა.

მოგეხსენებათ, კავშირის წევრებმა ვაჟა-ფშაველას 14 პოემა გადაწერეს და მხატვრულად გააფორმეს. გასულ წელს, ჩარგალში 2012 წლის 14 ივლისს გამართულ გამოფენაზე, ჩარჩოებში ჩასმული ხელნაწერი ორიგინალების გარდა, მუზეუმში წარმოვადგინეთ ამ ხელნაწერთა ამონაბეჭდით აკინძული და ძვირფასი ტყავის ყდით შემკული თითო წიგნი. კალიგრაფთა კავშირმა ხელნაკეთი წიგნები მუზეუმს მაშინვე უსახსოვრა.

წლევანდელ გამოფენაზე სინანულით აღმოვაჩინეთ, რომ წიგნის ფურცლები დაზიანებულია სინესტის გამო. ეს მოხდა ჩვენს თვალწინ, მხოლოდ ერთ წელიწადში და დაგვაფიქრა მუზეუმში დაცული სხვა ექსპონატების ბედმაც.

სამწუხაროა, რომ საქართველოს მთავრობის პასუხისმგებელი უწყებები დღემდე უყურადღებოდ ტოვებენ მსოფლიო მნიშვნელობის უდიდესი მოაზროვნისა და შემოქმედის ისედაც მოკრძალებულ მუზეუმს.

ფოტოგალერეა - 26 ოქტომბერი 2013, ჩარგალი